Ֆերիտին և երկաթ. ինչպե՞ս են փոխկապակցված քրոնիկ հոգնածությունը, մազաթափությունը և ցածր ֆերիտինը

Դուք բավարար քնում եք, սակայն շարունակում եք ձեզ ուժասպառ զգալ: Մազերը սովորականից ավելի շատ են մնում սանրի վրա: Ուշադրության կենտրոնացումը նվազում է, մաշկը կորցրել է փայլը, իսկ տրամադրությունը դարձել է անկայուն: Արյան հետազոտությունը ցույց է տալիս, որ հեմոգլոբինը նորմայի սահմաններում է, և բժիշկը չի կարողանում գտնել պատճառը:

Ծանոթ իրավիճա՞կ է:

Այս ամենի հիմքում կարող է ընկած լինել ցածր ֆերիտինը՝ ցուցանիշ, որը ստանդարտ արյան ընդհանուր հետազոտությունը սովորաբար չի ներառում, սակայն այն ուղղակիորեն ազդում է ինքնազգացողության, մազերի և մաշկի որակի, էներգիայի մակարդակի և նույնիսկ էմոցիոնալ հավասարակշռության վրա : Եկեք պարզենք, թե ինչ է ֆերիտինը, ինչու է այն նվազում և ինչպես շտկել իրավիճակը:

Ֆերիտին և երկաթ. ո՞րն է տարբերությունը 

Երկաթն օրգանիզմում առկա է մի քանի ձևով.

• Հեմոգլոբին. Սպիտակուց, որը տեղափոխում է թթվածինը արյան միջոցով (ստուգվում է ստանդարտ հետազոտությամբ):
• Ֆերիտին. Օրգանիզմի «պահեստավորված» երկաթը, որը բջիջներում պահվում է սպիտակուցային համալիրի տեսքով:

Երբ օրգանիզմն ունենում է երկաթի կարիք, նա առաջնահերթ սկսում է սպառել հենց այս պաշարները՝ ֆերիտինը : Հեմոգլոբինն այդ ընթացքում դեռ երկար ժամանակ կարող է մնալ նորմայի սահմաններում : Հենց սա է պատճառը, որ մարդն արդեն իսկ զգում է հոգնածություն և մազաթափություն, մինչդեռ անալիզները «ոչինչ ցույց չեն տալիս»: Այս վիճակը կոչվում է երկաթի լատենտ (թաքնված) դեֆիցիտ:

Ցածր ֆերիտինի ախտանշանները

Ցածր ֆերիտինը հազվադեպ է դրսևորվում մեկ ախտանիշով. հաճախ դա գանգատների մի ամբողջ շղթա է.

• Մշտական հոգնածություն, որը չի անցնում անգամ հանգստից հետո:
• Դիֆուզ մազաթափություն (մազերի հավասարաչափ նոսրացում ամբողջ գլխի մակերեսով):
• Դյուրաբեկ եղունգներ և դանդաղ աճ:
• Մաշկի չորություն, գունատություն և դեմքի անփայլ երանգ:
• Կենտրոնացման դժվարություն, «մառախուղ գլխում»:
• Դյուրագրգռություն, տագնապայնություն և տրամադրության տատանումներ:
• Արագացած սրտխփոց նույնիսկ թեթև ծանրաբեռնվածության դեպքում:
• «Անհանգիստ ոտքերի» համախտանիշ (տհաճ զգացողություններ ոտքերում գիշերային ժամերին):
• Իմունիտետի անկում և հաճախակի մրսածություն:

Ի՞նչն է համարվում նորմա

Լաբորատորիաների մեծ մասում նորմայի ստորին սահմանը նշվում է 10–15 նգ/մլ: Սակայն ժամանակակից կլինիկական հետազոտությունները փաստում են. լիարժեք ինքնազգացողության համար կնոջը հարկավոր է ֆերիտինի առնվազն 40–70 նգ/մլ մակարդակ : Հենց «լաբորատոր նորմայի» և «օպտիմալ մակարդակի» միջև եղած տարբերությունն է պատճառը, որ շատ պացիենտներ տարիներով չեն ստանում անհրաժեշտ բուժումը:

Ինչո՞ւ է նվազում ֆերիտինը

• Քրոնիկ արյան կորուստ. Առատ դաշտանը վերարտադրողական տարիքի կանանց մոտ ամենատարածված պատճառն է:
• Ոչ լիարժեք սննդակարգ. Վեգետարիանությունը կամ երկաթի ներծծմանը խանգարող սննդի չարաշահումը:
• Ներծծման խանգարումներ. Գաստրիտը կամ աղիքային բորբոքային հիվանդությունները:
• Հղիություն և հետծննդաբերական շրջան. Երբ պաշարները ծախսվում են պտղի զարգացման և մոր վերականգնման վրա:
• Ինտենսիվ ֆիզիկական ծանրաբեռնվածություն:

Ախտորոշում և բուժում

Ճիշտ ախտորոշման համար անհրաժեշտ է հանձնել ֆերիտինի արյան անալիզ, որը ստանդարտ հետազոտության մաս չի կազմում : Բուժման մոտեցումը կախված է դեֆիցիտի աստիճանից.

• Թեթև դեպքերում. Սննդակարգի շտկում և երկաթի պրեպարատների ընդունում:
• Արտահայտված դեֆիցիտի դեպքում. Երկաթի ներերակային ներարկումներ, ինչն ապահովում է արագ արդյունք արդեն 4-6 շաբաթ անց:

Մի՛ զբաղվեք ինքնաբուժությամբ: Երկաթի ավելցուկը կարող է նույնքան վնասակար լինել, որքան դեֆիցիտը:

Մոտեցումը Maletti Clinic-ում

Մենք գիտենք, որ երկաթը կենսական նշանակություն ունի կոլագենի սինթեզի համար, որից էլ կախված է մաշկի առաձգականությունն ու մազերի կառուցվածքը : Հենց այդ պատճառով, Maletti Clinic-ում մազերի կամ մաշկի որակի հետ կապված գանգատների դեպքում մենք առաջին հերթին խորհուրդ ենք տալիս ստուգել ֆերիտինի մակարդակը: Ոչ մի էսթետիկ միջամտություն չի տա երկարատև արդյունք, եթե խնդիրն ունի ներքին պատճառ:

Ամրագրեք խորհրդատվություն Maletti Clinic-ի էնդոկրինոլոգի մոտ և վերականգնեք ձեր էներգիան ու գեղեցկությունը: